Поздравляем с новыми проектами. Культурный комитет Союза саамов рассмотрел проекты на 2019 год.
Ruhta reahkkái dušše goalmmátoassái ohcamušain
Sámiráđi kulturdoarjagiid sáhtii ohcat čakčat. Sámiráđđi oaččui ohcanáiggis 67 prošeaktadoarjjaohcamuša ja 16 bargostipeandaohcamuša oktiibuot 600 000 euro (6 000 000 Norgga ruvnnu) ovddas.
Kulturlávdegoddi juolludii doarjagiid 41 prošektii lagabui 130 000 euro (1 200 000 Norgga ruvnnu) ja golbma bargostipeandda badjelaš 60 000 euro (600 000 Norgga ruvnnu) ovddas.
Kulturlávdegotti jođiheaddji Lill Tove Fredriksen mieđiha, ahte ohcamušaid vuoruheapmi lei váttis.
– Ledje dán jagi maid olu buorit ohcamat miehtá Sámis ja vuoruheapmi lea álo váttis. Lei dán jagi maid earenoamáš gealdu oaidnit bohtetgo seamma olu ohcamat go lávejit dál, go leimmet sirdán áigemeari juovlamánus čakčii, muhto eai lean stuora erohusat ohcanlogus.
Kulturlávdegoddi vuoruhii dán jagi bargostipeanddaid juolludemiin áigeguovdilis sámedáiddáriid. Bargostipeanddaid, mat leat dárkkuhuvvon doarjjan dáiddalaš bargguide, ožžo Máret Ánne Sara, Akkil ja Sara Ajnnak. Lill Tove Fredriksen muitala, ahte bargostipeandda ohcciin lei alla dássi.
– Sámiráđi bargostipeanda lea dehálaš doarjja min kulturbargiide, ja sis lei alla dássi. Dán jagi mii leat juolludan bargostipeandda golbma kulturbargái, geat buohkat leat hui áigeguovdilis dáiddárat Sámis, dadjá kulturlávdegotti jođiheaddji Lill Tove Fredriksen.
Kola Sápmi 