Моайнас са̅мь фла̅г баяс (Саамская сказка)

sami_flagКуһкенҍ, куһкенҍ Таввьлесьт, поштэ самэ пыӆӆькъесь чу̅ввесь Ма̅ттк та̅ссьт ву̅лленҍ, э̅ллесь Луя̅вьр я Хи̅бин поаке урьтэ ту̅гкенҍ, о̅ллтлэзэсьт су̅гкесь пе̅дзь я пе̅ссь – му̅рэ воаренҍ, су̅бпесь я̅гкэлэ ту̅гкенҍ, гу̅ пе̅ренҍ, ко̅гк ле̅в чогкнадтӭй кэ̅сскас ми̅стэгэгуэйм коаһтъюввма, ёаффмэнҍ я со̅птъюввма ке̅дҍк ку̅шкэгуэйм ёгэ ту̅гкенҍ, ву̅йнсэмэнҍ чи̅ӈӈлэсс ёавре я пэӆтэз шу̅нне ту̅гкенҍ, кудтҍ пе̅льт те̅ммесь а̅вьтэгуэйм Варьм ёгя ле̅ввнаннт е̅рркъя са̅мь сыййт – Луя̅ввьр сыййт.

Тоавас я ноаһц са̅мь И̅млеетҍ поаһкмужэ ми̅лльтэ я ми̅ллэ ми̅лльтэ пугк ти̅дтӭй о̅ллмэтҍ Са̅мь е̅ммьне альн е̅рркъя е̅ллей пу̅ллдэгэтҍ шэнтэ тэнн сыйтэсьт я пу̅дӭ куэссь-ля̅ннч Э̅ллманнтэ па̅ррьшя Ёаця я я̅лл со̅н ро̅дҍхэле ла̅ллмужэгуэйм, цымхэллмужэгуэйм я пя̅дцлэгуэйм. Ко̅ххт е пугк со̅н эфт па̅ллса па̅ррнэ, со̅нн о̅һпнувв шко̅ласьт. Тэнн гуэйкэ, штэ Ёаця ли̅ чофта пугк ти̅дтӭй па̅ррьшя, шко̅ласьт ли̅ пугк со̅н ми̅ллэ ми̅лльтэ. Со̅нн та̅һт я старръядт ти̅дтӭ пугк я пукэ баяс, та̅һт ти̅дтӭ я мэ̅ннэ че̅д э̅ллмант пя̅јтэтҍ, ча̅зь, воаре я ча̅р а̅рьвэ пэ̅йель. Аджесь, я̅ннэсь, уһцъе я о̅ллмэтҍ, ко̅гк пырр со̅н ле̅в, Ёаця суаһп шу̅рр вуэхьт- налла кэ̅жьнэгэтҍ: «Мэ̅ййт пе̅ннэ угк, э олма соарнант? Мэ̅ййт са̅ррвсэсьт ле̅в чуэрьв, э ла̅ммпсэсьт еввла? Мэ̅ййт ти̅рьмэсь ю̅ккс ли̅ югке-налшэм ывьнӭ я соййма ли̅ ю̅ккс, гу̅ коазэсьт се̅лльк? Мэ̅ййт ку̅лль вуянт ча̅зесьт, э лоаннҍт альмэсьт кыррт?» Я югке пе̅йв аввта пуэдтӭвь туафант кэ̅жьнэгкэ. Ми̅лл па̅ррьшясьт ли̅ чофта пассьтэль, я тэнн гуэйкэ Ёаця парнае кэскэсьт ку̅ллай ви̅знаһтэмь ке̅ллсайенҍ я моаййнсэтҍ олкэс лу̅шшьтъенҍ. Куэссь пуэдтӭв чоаһпесь ый та̅льв па̅ль Таввял ёрп ту̅гкенҍ, па̅ррьшя, куһка ки̅чант та̅сьт альм лоагка ка̅дмантэсьт, ми̅лэсьт во̅дтадт со̅нн та̅сьтэсьт тоасста. Э куэссь гыс кыдт поаһк пи̅ӈкэнҍ а̅бь альн ло̅ӈӈат луэмман ывьнҍ- нала пе̅ййв, ку̅ поштэ пе̅ль ыгь эйй луэшштэдэнҍт а̅бпа, Ёаця пассьтлэнне ке̅һч альхасьтэй ва̅рь э̅л, со̅н ту̅гкенҍ Вавьнпэд я Аппвуйэв поаке ву̅лльгесь луэкэ э̅л, койе ву̅йвэ лоагэ альн вя̅л ке̅зь пя̅ла пыӆӆькэв вэ̅дз кабперь, я каджь пи̅ӈкэсьт: «… Э ми̅ ли̅ вя̅л тампе о̅ллтлэзэсьт?»

Е̅насмусса шоабашт Ёаця по̅дтлэ ро̅дҍхэлеетҍ лыһк сайе, са̅мь на̅рэд ки̅дт ту̅е це̅ннтрэ. Ныдтҍ коадчет пэҏт, ку̅ ли̅ коаввас коаввэ кэсск па̅јк сыйтэсьт.

Аджесь ро̅бхушш художнэһкенҍ, я ки̅дт ту̅йенҍ, со̅н коадчетҍ «коалль ки̅дт о̅ллманҍ», ныдть са̅ррнэв со̅н баяс е̅нн о̅ллма. Я зоабэль, югке му̅ренч ажесь че̅песь ки̅дэнҍ, койт со̅нн сайй та̅мчсэнҍ, пылл са̅генҍ, нёллькад на̅дтҍфиленҍ я пассьтлэсь ныйпэнҍ, коаввсаннт тэ тоаллэнҍ, тэ удць моййнас ва̅рь ча̅һклиӈӈькэнҍ, э пыллма пе̅ссь-му̅рэсьт е̅верь шаннт нуэйт о̅ллма коаммдассэнҍ.

Е̅ннҍнӭсь Ёацясьт выгк са̅мь на̅рэд це̅нтрэсьт па̅ррнэ пляссъемь ансамбль, касьт, мэ̅нн ве̅рьт и̅жесь мушшт, пляссай я со̅нн. Со̅н пай тыквэнлэдтӭ тэдт ту̅йй, штэ пэре ёаффяй я эль кулсканнҍтэй парна туһк пляссъем па̅ль, тыввнэдтма са̅мь оассэгуэйм, коаввсаннт тэ вуагкэй коаннҍт пу̅дзэ чу̅дзэнҍ, тэ коаллькэй ва̅ррь вуаянҍ, тэ сыйт альн кыррьтэй нюххченҍ.

«Чумэсьт» це̅нтр оаввьдэмь пе̅йвэсьт ко̅дзэшь сте̅ннэ ёррп за̅лэсьт са̅мь фла̅г, тэдта ля̅йй Ёаця гуэйкэ самэ чу̅ввесь, мо̅джесь, ку̅тҍк анҍсэмь тыквэннву̅дт, со̅н вя̅л эль чофта шу̅рр е̅ллем агесьт. Фла̅г лыйнэсьт ли̅йенҍ не̅лльй ывьнҍ: ру̅ппьсесь, алехь, руэнн я руччкесь. Кыррьй я ывьнҍ фла̅гэсьт моайнсэнҍ па̅ррьшенньче пе̅йв я ма̅н кыјјмуж баяс че̅хч Варьм ёг алехь чазесьт, я ру̅ппьсесь ра̅шшьн ту̅ркэтҍ ру̅ппьсесь му̅рьегуэйм, я коалль пе̅ссь-му̅р суагэтҍ, я агкъесь руэнн ку̅зэтҍ. Е̅ннгэетҍ кэ̅жьтэлэ па̅ррьшя: «… мэ̅нн баяс моайнсэв ывьнҍ фла̅г лыйн альн, ру̅ппьсесь-алех пя̅ллт я алехь- ру̅ппьсесь кру̅гк, руэнн я руччкесь чу̅йяс?» Нэ, нике эйй вуайя то̅ӆӆкъеннӭ моайнсэ Ёацьне са̅мь фла̅г баяс.

О̅дт ый ыгь маӈӈэ о̅дт ыгь ку̅з пра̅зьнэһка це̅нтрэсьт Ёаця ня̅ллксэнне нагьрувэ пэҏтэсьт лоаезэ тугкэнҍ туэла альн со̅н кроавхэн поалльтэ. Я не̅гкъювэ соннӭ тэнна па̅ссь ыесьт моайнас нагерь. Быдтэ штэ со̅нн ли̅ це̅нтр ёррп за̅лэсьт ву̅ййкэсьт са̅мь фла̅г эвтэсьт. Айнханна фла̅г ту̅гкенҍ ыдӭ удць о̅ллмъенч кугкесь югке-наллшэм ывьнҍ ся̅ммнэнҍ руэнн чо̅гк кабпренҍ, са̅һпьегуэйм пе̅ль-ёрп канҍтэ альн я вуэккьс поаӆкэнҍ чинч пе̅ль ки̅дэсьт я каджь Ёацясьт: «Мэ̅ййт, па̅ррьшя, ки̅чнак то̅нн со̅н э̅л, я мэ̅нн уйнак то̅нн со̅н альн?» Ёаця айнханна кэ̅жьнэгэсьт су̅рркэнҍт, черькэдҍ, ноэ со̅нн тэсьт шэ оаммшувэ, я и̅джь кэ̅джель тэнн тыгквэн о̅ллмэсьт: «А ке̅ то̅нн гыс ля̅к я касьт то̅нн тэста ыдтэнч ляк?» «Мунн ля̅ Чу̅дзик, отҍхужэ соннӭ ка̅ллсэнч, я̅ла тэста, ки̅чна обряд ми̅лльтэ, ки̅ча, штобэ манҍтэ –не ма̅дт эйй выйтче пэ. Э вя̅ӆӆтэдтӭ ти̅ге, куэссь « Чум» оассешь. Тэнн па̅лесьт я е̅лча тэйе шу̅рр ко̅ммнатэнҍ я за̅лэнҍ.

Ну а куэссь ти̅ге Це̅ннтр вя̅ӆӆтэдэ, тэста тэннханнэ шэ ныдтҍ поакас я чу̅ввдэнне шэнтэ, я̅ла адть гу̅ И̅ммель раесьт. Э тэль годтҍ мун Чу̅дзикэнҍ коадчет, дак э̅ввтэль, тэнн райя, е̅лче мунн Чу̅дзьявьр сыйтэсьт, ли̅йе мунн со̅н пынньенҍ я та̅рьйсэллъенҍ, э куэссь со̅н поадхэшь, мунн пукэ соамегуэйм Луя̅ввра я вя̅ӆӆтэдтӭ.Тэста, ми̅нэнҍ сыйтэсьт, е̅ннэ мыйе, та̅рьйсэллъедтӭ ли, югке-наллшэм сыйтэнҍ копчнэдтма ле̅бпь. Мун коанцням Лу̅мбик, Ва̅рзик, Со̅нгелик пуэдтӭв адтҍ мыннӭ пра̅знушшэ, дак сыйй ныдтҍ шэ, ке̅ касьт пуадтма ле̅в ти̅ге югке-наллшэм сыйтэнҍ. Мудта ё муштэсьт еввла, э сыйй водт Луя̅ввра я вя̅ӆӆтэдтэнҍ.!!!

Чу̅дзик айнханна пушшьтлувэ я ка̅дтэль фла̅г лыйн туэгка, э че̅сс пайесьт ыдтӭль моазэ сыллп вуаза-пу̅дзъенҍ хрустальнэ чуарвагуэйм я са̅ррн Ёацьне:

«Ышт тэнна пу̅дзъе э̅л, со̅нн ли̅ па̅ссь пу̅дзъенч, я чу̅һкас ши̅гктэнне те̅дт, че̅сс пайе ко̅сстад то̅н се̅ййт су̅ллъе Ча̅ръявьрэсьт ми̅ллвъесь- мудтэр я пугк ти̅дтӭй пуэресь Са̅нндрэ агкне о̅ллмаһта е̅ллье. Со̅нн дэдт пугк тоннӭ моайнаст са̅мь фла̅г баяс, э те̅дт со̅нн чофта е̅ннэ, я моайнаст со̅нн пукэ баяс, ми̅ пырр ми̅нэ ли̅»-, э и̅джь ка̅дтэль, ко̅ххт е ыдтӭль.

Удлэнне ышштэль Ёаця сыллп пу̅дзъе э̅л хрустальнэ чуарвагуэйм, я вуагкэл, удлэ ло̅ӈӈэнҍ пэйель вэ̅зэ ву̅льн эййма воаре, кэ̅сс и̅ӈэ вульн пе̅јтчедтма ёгэ, ёавьрэ, я вуадтъенч жемчужнэ вуаль ву̅льн ча̅р. Э вуэйв альн альмэсьт аввта пу̅ле, ле̅ввнэнтэ, кэшкнэдэ югке-наллшэм ывьнӭгуэйм воафсхэсс.

Вэххтэнне кырьтэдҍ со̅н сыллп пу̅дзъенч хрустальнэ чуарвагуэйм тэнн сайя, ко̅нн баяс мушштэл Чу̅дзик. Уййн Ёак су̅ллъесьт кэсска Ча̅ръявьр, ку никоссьхэнҍ эйй и̅ӈӈлувэнҍт, альт шу̅рр пе̅зь куэдь, ку ли̅ вэзэнҍ аййлуввма, э̅ллтэнҍт куадне я та̅гкэл уккьсе. Кулл укс ту̅гкенҍ су̅бпесь я пу̅ррь и̅н: «Суаӈ, Ёаця, суаӈ!» Па̅ррьшя суаӈэ куэдҍ сыз я уййн : му̅р вуаннтсэнҍ лыһкма кре̅сласьт оарр ву̅ййкэсьт а̅кэнч, туввнэдтма пе̅цкэнҍ я коаммсэнҍ ку̅ррма та̅лльв коаммэгуэйм.

О̅ллтлагка соннэ пуалл та̅гкь, ку̅ а̅ввт я чу̅ввад куэдҍ. Агка эвтэсьт чу̅лт альн чоагкашт прозрачнэ, че̅д ку̅ссьтэй, я ву̅ййк и̅ӈӈ кусськ. Э че̅д сон ку̅сстай э̅ллмса Э̅ллмант.

«Ти̅ррв, Са̅ндра а̅ка», — ци̅ӆьке па̅ррьшя! «Ти̅ррв, ти̅ррв, Ёаця»,- вуэсстал соннӭ Са̅ндра а̅ка. Ыштэдтҍ куэдтҍ е̅меннҍт ку̅ссь о̅ллма та̅гь лу̅з паллтас кэдҍ э̅л я ку̅сседтӭ со̅н, ва̅рр о̅ллма, лэ̅гкьясь пу̅лле чоаенҍ, па̅ррмэнч ча̅рр су̅йнэ я му̅рьегуэйм. Са̅ррн Ёацьне ми̅ллвэс я мудтэр Са̅ндра а̅ка:

«Кулле мунн, штэ то̅нн ти̅дтӭ та̅так, мэ̅нн баяс моайнсэв са̅мь фла̅г ывьнҍ я кырьйнэз, дак куллтэл, па̅ррьшя, пя̅јт те̅дэтҍ е̅ррка са̅мь ро̅дэтҍ, кырьйхэнч ся̅дтэ се̅ййт лыйн альн Са̅мь е̅ммьнесьт агас е̅лльетҍ.»
Мудтэр Са̅ндра а̅ка ыштэ ши̅һтла эвтэс кэ̅нньлятҍ ко̅лльктэй я «мушштлэй» ву̅ййк и̅ӈ куськ, ку̅ кыјмэтҍ кэсскэ та̅гь ру̅ппьсесь кэшкнадтӭй то̅л ню̅ххчмэтҍ, я оалкэһтҍ и̅жесь моаййнас: «Са̅мь фла̅гк мушштал о̅ллмне пукэ баяс, ми̅ ли̅ пырр ми̅нэ, ыге кэска баяс, лэнӭ баяс, касьт е̅ллев ми̅н са̅мь ви̅льй я вуэррьпэнҍ, соаме е̅ллем ноале баяс я ноале я̅ллмуж баяс, э̅ллмант пи̅ле баяс, то̅л, ча̅зь, е̅ммьне ву̅йн баяс я вя̅л мудта е̅ннэ баяс. Ру̅ппьсесь ыввьнҍ фла̅гэсьт, ко̅ххт я ко̅ллм мудта- алехь, руэнн я руччкесь — пыйнэв: авьтмусс ли̅ то̅л ву̅йнас, ныммьп ли̅ ча̅зь ву̅йнас, куалмант ли̅ е̅ммьне ву̅йнас, ня̅льянт ли̅ е̅ррка пу̅ллдэгэтҍ ву̅йнас. Сыйй шэ вуэзхэллэв: ру̅ппьсесь – шэннтътэмушш, э̅ллманнта ыдтҍмушш, са̅мь И̅ммьлетҍ я̅ллмуж лоајесс о̅ллмне эле жэватҍ; руэнн ли̅ агь ти̅дтҍмушш е̅ллем ноалетҍ, е̅ммьне ти̅дтҍмушш я ки̅дт ту̅е ти̅дтҍмушш; алехь ли̅ агкь о̅ллма вуэсстлэмушш ту̅е эвтэсьт, ро̅д е̅ллем- ноалетҍ пынньмушш, пя̅дцэль пе̅ль ва̅ллтмуж са̅мь на̅рэд я пи̅ррас эвтэсьт, е̅ммьне я ча̅зь баяс; руччкесь ли̅ агкь мудтэрвудт, те̅дэтҍ я ноаһцвудэтҍ аннҍтмушш ми̅лльтэ пуэдтӭй пу̅ллдэгэтҍ.

Тэнн шэ вуэр: ру̅ппьсесь ыввьнҍ вуэзхалл кыд – е̅ммьне я̅ллнэнтмуж, пу̅дзэтҍ лашшнэмуж, оалк о̅дт я̅ллмуж я соаййв, кассьт куэссь-ля̅ннч е̅ррка моаййнсэмужэ ми̅лльтэ пу̅дтӭнҍ ти̅ге о̅ллтлэз пу̅ллдэг; алехь вуэзхалл та̅льв, Коам ый я таввял; руэнн ли̅ ке̅ссь, Полярнэ пе̅ййв я нуҏьта; руччкесь ли̅ че̅ххч ча̅р я ва̅рь ва̅пптэгк шантнэзэгуэйм я вуэрьялл, касьт тоайв е̅ррка па̅лесьт пуэдтлэннҍтэнҍ соаметҍ вуэјјтэй ви̅г, ноэ югке вуэр уйтнэнҍ моазэ та̅гкмэнч я курас ки̅дэгуэйм. Ныдтҍ шэ ру̅ппьсесь ыввьнҍ вуэзхалл ланҍ э̅л –Та̅р ланҍ э̅л, алехь – Ла̅дтҍ ланҍ э̅л, руччкесь – Ру̅ц ланҍ э̅л э руэнн Ру̅шш ланҍ э̅л.Тэйе лэнӭнҍ е̅ррка па̅лесьт мыйй- са̅мь ро̅д- я е̅ллепь.

Перевод на саамский язык Н.Е. Афанасьева

lippuкарта

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google photo

Для комментария используется ваша учётная запись Google. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s